O pasado domingo, 12 de xaneiro, tiven a honra de participar no programa Lume na Palleira de Radio Galega Música, un espazo único dedicado á música tradicional e á cultura galega. No marco da sección O recuncho da palleta, coordinada pola Asociación de Gaiteiros Galegos e presentada nesta ocasión por Xaime Estévez, compartín o meu traballo e paixón pola nosa música, centrando a miña intervención na figura de Avelino Cachafeiro e os inesquecibles Gaiteiros de Soutelo.

Durante o programa, falamos sobre a vida e obra de Avelino Cachafeiro, coñecido como O Gaiteiro de Soutelo. Tivemos a oportunidade de repasar o legado musical deste cuarteto histórico, escoitando gravacións orixinais que seguen sendo unha referencia fundamental da nosa música tradicional: "A volta da festa", "La Alfonsina", "Fandango de Pontevedra", "Alborada de Rosalía de Castro" e "Muiñeira de Chantada". 

Quero agradecer ao programa Lume na Palleira e á Radio Galega a oportunidade de participar e difundir o noso legado musical. É un privilexio que existan espazos coma este, que permiten dar voz á música tradicional e visibilizar o traballo de todos aqueles que loitamos por manter vivas as raíces sonoras de Galicia.