O vindeiro domingo 12 de xaneiro, ás 17:00 horas, o programa Lume na Palleira de Radio Galega Música acollerá unha nova entrega de O recuncho da palleta, unha sección coordinada pola Asociación de Gaiteiros Galegos. Nesta ocasión, a emisión estará presentada por Xaime Estévez e contará coa participación de Rubén Troitiño, quen centrará a súa intervención na figura de Avelino Cachafeiro e os gaiteiros de Soutelo.

O programa incluirá unha análise da vida e obra de Avelino Cachafeiro, tamén coñecido como O Gaiteiro de Soutelo, nunha edición que serve para pechar o ano de actos conmemorativos polo centenario do seu nomeamento como mellor gaiteiro de Galicia. Durante a conversa, tamén se abordará o legado musical dos gaiteiros de Soutelo e ofreceranse as gravacións orixinais do histórico cuarteto de gaitas, considerado unha referencia fundamental da música galega. 

Lume na Palleira, presentado por Emilio Españadero, é un programa dedicado á música tradicional e á cultura galega que ten como obxectivo dar visibilidade ao traballo de músicos e colectivos comprometidos coas raíces sonoras de Galicia. 

A emisión poderá seguirse este domingo a través de Radio Galega Música, ás 17:00 horas.