Ruben Troitiño
www.rubentroitino.com
www.rubentroitino.com
Novas
La Pasión de Juana de Arco - Carl Theodor Dreyer
14 de novembro de 2022
14 de novembro de 2022
La Pasión de Juana de Arco - Carl Theodor Dreyer
Coro de Cámara Rías Baixas: O próximo día 18 de novembro presentamos na Casa da Cultura de Monforte de Lemos un proxecto moi especial para nós, e que fora retrasado máis de dous anos por mor da pandemia.
Xunto co ensemble Caspervek e ás ordes de Brais González, formaremos parte da banda sonora da película muda "A Paixón de Xoana de Arco", de Carl Theodor Dreyer, un filme de 1928 que marcou un antes e un despois na historia do cinema.
A banda sonora foi composta e arranxada ex-profeso polo propio Brais á medida do filme. Para nós, que formamos parte na súa estrea no ano 2019, significa retomar unha colaboración moi importante dentro das nosas actividades.
XOANA DE ARCO:
Naceu en xaneiro de 1412 en Domrémy, no seo dunha familia campesiña acomodada. Viviu nun período da guerra dos 100 anos que enfrontaba a Francia (Carlos VII – herdeiro ao trono-) e Inglaterra (Enrique VI) polo trono de Francia. En 1429, Xoana de Arco, baixo ordes divinas, dirixiu un exército de máis de cinco mil homes, que lle confiou o herdeiro francés, conquerindo a vitoria en Orleans. Este feito permitiu que Carlos VII fose coroado de maneira simbólica como rei de Francia en Reims. En Compiègne, o 24 de maio de 1430, foi capturada polo duque de Borgoña. Tempo despois foi vendida ao exército inglés e levada ata Ruán (capital das posesións inglesas en Francia) ante un tribunal eclesiástico, (Lord Warwick, o gobernador da cidade, escolleu aos xurados entre os aliados do Rey de Inglaterra) que a condena a morrer na fogueira, sendo executada o 30 de maio de 1431 na praza de Ruán, aos 19 anos.
En 1909 foi beatificada e canonizada en 1920, converténdose na patroa de Francia e no símbolo da unidade nacional.
A PAIXON DE XOANA DE ARCO
É unha película muda de 1928 (considerada a segunda mellor película francesa de todos os tempos) do director e guionista danés Carl Theodor Dreyer, protagonizada por Maria Falconetti. Conta o procesamento e execución da heroína francesa pola Inquisición. Baséase na documentación auténtica do seu xuízo.
É destacada como un fito do cinema, sobre todo pola súa producción, a dirección de Dreyer e a actuación de Falconetti, que foi descrita como unha das mellores da historia do cinema.
MISSA IOANNA ARCENSIS (Requiem por Xoana de Arco)
Trátase dunha misa de defuntos, o que nos leva a deducir o triste final, repartindo a carga emotiva ao longo de toda a obra.
Composta por Brais González, para piano, ensemble e coro mixto. O autor tocará o piano e dirixirá o Ensemble Caspervek (conxunto no que se inclúen instrumentos de corda, vento e percusión, ademais do xa citado piano). O Coro de Cámara Rias Baixas, que dirixe Bruno Díaz, será o encargado de poñer as voces a esta gran obra.
BRAIS GONZÁLEZ
Nacido en Vigo en 1987, inicia os seus estudos de piano na súa cidade natal, os continua na Universidade Mozarteum de Salzburgo (Austria) e os completa nos Consevatorios superiores de Vigo e Oviedo.
A súa carreira sempre estivo dividida entre a interpretación clásica e unha apaixonante viaxe como compositor e creador sonoro que sempre busca unir diferentes universos estilísticos, desde a música contemporánea ata a música folk, indie ou de cinema.
Como compositor, as súas obras sinfónicas foron interpretadas por diferentes orquestras españolas e portuguesas e dirixidas por destacados mestres. As súas obras de cámara foron interpretadas en diversos países de Europa e América. Ademais, é o director artístico e principal compositor de Caspervek Ensemble, grupo dedicado á música en directo do cinema mudo, co que actuou en máis dunha ducia de países europeos, sendo a súa última xira, no pasado mes de setembro, por Alemaña e Dinamarca. En agosto deste ano estrea no Festival delle Nazioni de Città dei Castello (Perugia - Italia), por encargo do propio Festival, a súa primeira ópera: "Loba Branca", da que tamen é autor do libreto baseado nunha lenda de O Courel.
CORO DE CÁMARA RIAS BAIXAS
O Coro de Cámara Rías Baixas é unha formación non profesional que persegue a excelencia musical. Dende a súa presentación en 2014 leva realizado un centenar de concertos de carón. É un grupo xa consolidado no sur de Galicia. O coro interpretou obras fundamentais do repertorio coral acompañado das principais orquestras da comunidade. Ademais, tamén organiza regularmente concertos de produción propia que difunden obras de compositores galegos e permiten a proxección de novos solistas. Desde 2017 colabora con Amigos da Ópera de Vigo e coa Orquestra Sinfónica Vigo 430 na súa programación anual. Por outra banda, tamén interpreta música a capella nos concertos organizados pola federación coral ACOPOVI. O equipo artístico do Coro de Cámara Rías Baixas está formado pola profesora de canto Magna Ferreira, o pianista acompañante Brais González e o director Bruno Díaz.